គ្រូបង្វឹកទាំងពីរចាប់ដៃគ្នា
លោក Leonardo Vitorino គ្រូបង្វឹក Lanexang United បានប្រាប់អ្នកសារព័ត៌មានព្រឹកមិញនេះថា លោកមកកម្ពុជាដើម្បីឈ្នះ និងមកដើម្បីលេងបាល់ទាត់។ លោកមិនខ្វល់ពីក្រុមរបស់លោកថាតើមានតារាឆ្នើម ឬអត់នោះទេ ប៉ុន្តែលោកផ្តោតសំខាន់លើគន្លឹះ៣យ៉ាងដែលអាចយកឈ្នះក្រុមបឹងកេតអង្គរបាន។ គន្លឹះសំខាន់ដែលក្រុមរបស់លោកត្រូវធ្វើគឺ ស្មារតីក្រុម មិត្តភាព និងសហការក្រុម។
គ្រូបង្វឹកសញ្ជាតិប្រេស៊ីលរូបនេះបានឲ្យដឹងថា លោកបានស្គាល់យ៉ាងច្បាស់ពីក្រុមបឹងកេតអង្គរដែលជាជើងឯកលីគបាល់ទាត់កំពូលកម្ពុជា និងជាក្រុមខ្លាំងមួយ។ និយាយពីកីឡាករវិញ ក្រុមកម្ពុជាមួយនេះមានខ្សែការពារល្អ ខ្សែប្រយុទ្ធល្អ និងអ្នកចាំទីក៏ល្អដូចជា ឃួន ឡាបូរ៉ាវី ស៊ូ យ៉ាទី និង ចាន់ វឌ្ឍនាកា ដែលជា Super Star ប្រចាំក្រុម និងជម្រើសជាតិកម្ពុជា ព្រមទាំងកីឡាករល្អៗជាច្រើនរាប់បញ្ចូលទាំងកីឡាករបរទេស។
ចំពោះលោក ប្រាក់ សុវណ្ណារ៉ា គ្រូបង្វឹកបឹងកេតអង្គរបានប្រាប់ថា លោកមិនអាចនិយាយបានថាតើប៉ុន្មានភាគរយដែលក្រុមរបស់លោកអាចទទួលបានជ័យជម្នះ ប៉ុន្តែទុកឲ្យបងប្អូនអ្នកសារព័ត៌មាន ក៏ដូចជាអ្នកគាំទ្រជាអ្នកកំណត់ភាគរយវិញ។ ការប្រកួតនេះនឹងលំបាកសម្រាប់បឹងកេត ពីព្រោះបឹងកេតមានកីឡាករសំខាន់ៗរបួសច្រើន។ លោកបានកត់សំគាល់ឃើញថា ក្រុម Lanexang United ពិតជាល្អដោយការប្រកួតកន្លងមក ខ្សែប្រយុទ្ធរបស់ក្រុមនេះបញ្ចប់ទីបានល្អ។ កីឡាកររបស់ក្រុមឡាវនេះលោកបានស្គាល់ច្បាស់ ហើយអ្នកគាំទ្រកម្ពុជាក៏បានស្គាល់ច្រើនដែរនៅពេលពួកគេជា Lao All Stars មកលេងជាមួយ Cambodian All Stars។ ដូច្នេះសង្ឃឹមថា ការប្រកួតថ្ងៃស្អែកពិតជាអស្ចារ្យសម្រាប់ក្រុមទាំងពីរ និងអ្នកគាំទ្រ៕
លោក ប្រាក់ សុវណ្ណារ៉ា គ្រូបង្វឹកបឹងកេត
Blogger Comment
Facebook Comment